डॉ. पंजाबराव देशमुख कृषिरत्न पुरस्कार

           जळगाव, दि. 9 (जिमाका वृत्तसेवा) :- महाराष्ट्र राज्य कृषी उत्पादन व कृषी उद्योग क्षेत्रात अग्रेसर राज्य म्हणून ओळखले जाते. राज्यात दर वर्षी शेती व पूरक क्षेत्रात अति उल्लेखनीय कार्य करणाऱ्या शेतकऱ्यास अथवा संस्थेस कृषी विभागामार्फत महाराष्ट्र राज्याचे मा. राज्यपाल महोदय यांचे हस्ते विविध कृषी पुरस्कार देऊन सन्मानित करण्यात येते. दरवर्षी प्रमाणे सन 2021 साठी  कृषी विभागामार्फत नाशिक विभागातील शेतकऱ्यांकडून डॉ. पंजाबराव देशमुख कृषीरत्न पुरस्कारासाठी प्रस्ताव मागविण्यात येत आहेत. डॉ. पंजाबराव देशमुख कृषिरत्न पुरस्कार हा कृषी विभागामार्फत कृषी क्षेत्रात संघटनात्मक, राज्याला दिशादर्शक आणि अतिउल्लेखनीय कार्य करणाऱ्या व्यक्ती, गट अथवा संस्थेला देण्यात येणारा कृषी क्षेत्रातील सर्वोच्च पुरस्कार आहे.

पुरस्काराचे स्वरूप – रुपये- 75000 /- हजार रकमेचा धनादेश, स्मृतीचिन्ह व सपत्नीक / पतीसह सत्कार देण्यात येणारे पुरस्कार संख्या - राज्यात एक

           पुरस्कारासाठीचे निकष –

1. प्रस्तावित शेतकरी / गट / संस्था यांना केंद्र किंवा राज्य शासनाचा कोणताही कृषी पुरस्कार प्राप्त झालेला असावा. शेतकऱ्यांच्या स्वतःच्या नावावर शेती असावी आणि कुटुंबीयांसह त्याचा शेती हा मुख्य व्यवसाय असावा.

2. प्रस्तावित शेतकरी यशस्वी उत्पादन, रोपवाटिका, सेंद्रिय शेती निविष्ठा उत्पादन व वापर, काढणी पश्चात व्यवस्थापन, साठवणूक व मूल्यवर्धन, कृषि प्रक्रिया, निर्यात इत्यादी कार्यात सहभागी होऊन परिसरातील शेतकऱ्यांना मार्गदर्शन करणारा असावा.

3. शासनाच्या कृषी विभागाकडून दिल्या जाणाऱ्या राज्यस्तरीय दोन पुरस्कारांमधील अंतर किमान पाच वर्ष असावे.

4. संबंधित शेतकरी केंद्र राज्य शासकीय निमशासकीय किंवा शासन अंगीकृत संस्थेमध्ये नोकरी करत नसावा किंवा सेवानिवृत्ती वेतन किंवा कोणत्याही प्रकारचे नियमित मानधन घेणारा नसावा.

 प्रस्तावासोबत आवश्यक कागदपत्रे

1. 7/12 व 8- अ चा उतारा

2. केंद्र राज्य शासकीय निमशासकीय किंवा शासन अंगीकृत संस्थेमध्ये नोकरी करत नसले बाबत तसेच सेवानिवृत्ती वेतन व मानधन घेत नसल्याबाबतचे स्वयंघोषणापत्र

3. मूळ प्रतीतील जिल्हा पोलीस अधीक्षक कार्यालयाचा चारित्र्याचा दाखला

4. संबंधित शेतकऱ्याला संस्थेला मिळालेले पुरस्कार व कृषी विषयक कार्य दर्शविणारे

प्रमाणपत्रे इ.

          तरी वरीलप्रमाणे नाशिक विभागातील पात्र इच्छुक शेतकऱ्यानी अधिक माहितीसाठी आपल्या तालुक्यातील तालुका कृषि अधिकारी कार्यालयाशी संपर्क साधून पुरस्कारासाठी प्रस्ताव सादर करावा, असे आवाहन  विभागीय कृषि महासंचालक नाशिक विभाग नाशिक मोहन वाघ यांनी  एका प्रसिध्दीस दिलेल्या पत्रकान्वये केले आहे.

.00000