कोविड केअर सेंटरमधील चांगल्या सुविधांमुळे एरंडोल उपविभागात रुग्ण बरे होण्याचा दर 68 टक्के उपविभागीय अधिकारी विनय गोसावी यांची माहिती

            जळगाव, दि. 28 - एरंडोल उपविभागात कोवीड केअर सेंटरमध्ये चांगल्या सुविधा दिल्या जात असल्याने कोरोना बाधित रुग्ण बरे होण्याचा दर 68 टक्के झाला आहे ही समाधानाची बाब आहे. अशी माहिती एरंडोल उपविभागाचे उपविभागीय अधिकारी विनय गोसावी यांनी दिली आहे.

            या उपविभागात पॉझिटिव्ह रुग्णांच्या संपर्कात आलेल्यांची प्राधान्याने ट्रेसिंग झाल्याने संभाव्य रुग्णांना लवकर केअर सेंटरमध्ये आणून उपचार केले गेले, यामुळे रुग्ण बरे होण्याचे प्रमाण वाढले आहे.

            देशात, राज्यात कोरोना संसर्गाचा प्रादुर्भाव सुरू झाल्यानंतर एरंडोल उपविभागात तिस-या लॉकडाऊनपर्यंत एकही रुग्ण नव्हता. मात्र परराज्यातून, परजिल्ह्यातून नागरिक येण्यास सुरूवात झाल्यानंतर कोरोना रुग्ण येथे आढळला.

            उपविभागातील तहसीलदार, गटविकास अधिकारी, तालुका वैद्यकिय अधिकारी, आरोग्य व पोलिस यंत्रणा यांच्या सहकार्याने पॉझिटिव्ह रुग्णांच्या संपर्कातील रुग्णांचे ट्रेसिंग वाढविण्यात आले. यामुळे संशयितांची लागलीच तपासणी व उपचार करता आले. कोविड केअर सेंटरमध्येही डॉक्‍टर, इतर स्टाफने चांगल्या सुविधा दिल्याने रुग्ण बरे होण्याचे प्रमाण वाढले.

            एरंडोल विभागातील एरंडोल, पारोळा, धरणगाव या तालुक्यातील कोविड रुग्णालयात सध्या 533 पैकी 141 रुग्ण आता दाखल आहेत. एकूण पॉझिटीव्ह रूग्णांपैकी 70% पॉझिटीव्ह कॉन्टॅक्ट टेसिंग मध्ये आढळले म्हणून रुग्ण संख्या वाढली, पण कॉन्टॅक्ट ट्सिंगमध्ये रुग्ण वाढल्याने योग्यवेळी हे रुग्ण समाजापासून विलगीकरण झाले. तर प्रतिबंधित क्षेत्राबाहेरील केवळ 10 टक्के रूग्ण  आढळले आहे.

            पालकमंत्री ना. गुलाबराव पाटील, जिल्हाधिकारी अभिजीत राऊत यांनी वेळोवेळी केलेले मार्गदर्शन आणि उपविभागातील नागरिकांनी तसेच इतर सर्व लोकप्रतिनिधी यांनी केलेले सहकार्य यामुळे एरंडोल उपविभागातील रूग्ण बरे होण्याचा दर 68 टक्क्यांपर्यत पोहोचला असून याबाबत नागरिकांमध्येही समाधान असल्याचेही श्री. गोसावी यांनी कळविले आहे.

000000