जागतिक कौशल्य स्पर्धा २०२६ मध्ये सहभागी होण्याची सुवर्णसंधी : जिल्ह्यातील तरुणांसाठी आंतरराष्ट्रीय स्तरावर कौशल्य सादरीकरणाची संधी

         जळगाव, दि. ५ ऑगस्ट (जिमाका वृत्तसेवा) – जगभरातील तरुणांना व्यावसायिक शिक्षण आणि कौशल्य उत्कृष्टतेच्या आधारे आंतरराष्ट्रीय स्तरावर आपली क्षमता सादर करण्याची अनोखी संधी मिळणार आहे. सन २०२६ मध्ये आयोजित होणाऱ्या जागतिक कौशल्य स्पर्धेचे आयोजन चीनमधील शांघाई येथे होणार असून, ही स्पर्धा जगातील सर्वात मोठी आणि प्रतिष्ठित व्यावसायिक कौशल्य स्पर्धा मानली जाते.

            सन २०२६ मधील स्पर्धेसाठी भारताच्या विविध राज्यांमधून पात्र उमेदवारांची निवड करण्यासाठी जिल्हा, विभाग, राज्य आणि राष्ट्रीय स्तरांवर कौशल्य स्पर्धांचे आयोजन केले जाणार आहे. यामध्ये जळगाव जिल्ह्यातील तरुण-तरुणींनाही सहभाग घेण्याची संधी उपलब्ध झाली आहे.

            या स्पर्धेच्या पार्श्वभूमीवर, जिल्हा आणि राज्यस्तरावर व्यवसाय शिक्षण व प्रशिक्षण संचालनालय, सेक्टर स्किल स्पर्धा विभाग, तसेच विविध औद्योगिक आस्थापनांच्या सहकार्याने कौशल्य स्पर्धांचे आयोजन करण्यात येणार आहे. ही स्पर्धा तीन टप्प्यांमध्ये राबवली जाणार असून, त्यामधून निवड झालेल्या उमेदवारांना राष्ट्रीय स्तरावर आणि त्यानंतर जागतिक स्तरावर भारताचे प्रतिनिधित्व करण्याची संधी मिळणार आहे.

            या स्पर्धेत सहभागी होण्यासाठी वयाचे निकष निश्चित करण्यात आले आहेत. सामान्यतः ५० कौशल्य क्षेत्रांसाठी उमेदवाराचा जन्म १ जानेवारी २००४ किंवा त्यानंतरचा असणे आवश्यक आहे. तर Digital Construction, Cloud Computing, Cyber Security, ICT Network Infrastructure, Additive Manufacturing, Industrial Design Technology, Industry 4.0, Mechatronics, Optoelectronic Technology, Robot System Integration, Water Technology, Dental Prosthetics आणि Aircraft Maintenance या १३ प्रगत क्षेत्रांकरिता उमेदवाराचा जन्म १ जानेवारी २००१ किंवा त्यानंतरचा असणे अनिवार्य आहे.

            या स्पर्धेत सहभागी होण्यासाठी जिल्ह्यातील सर्व ITI, पॉलिटेक्निक, MSME टूल रूम्स, CIPET, IIT, इंजिनिअरिंग कॉलेजेस, हॉटेल मॅनेजमेंट व हॉस्पिटॅलिटी संस्था, कॉर्पोरेट टेक्निकल इन्स्टिट्यूट, कौशल्य प्रशिक्षण संस्था, महाराष्ट्र स्टेट स्किल युनिव्हर्सिटी, MSBVET, खाजगी स्किल युनिव्हर्सिटी, फाईन आर्ट्स कॉलेजेस, दागिन्यांचे डिझाईन प्रशिक्षण संस्था, फुलशेती प्रशिक्षण संस्था व इतर कौशल्य प्रशिक्षण केंद्रांमधील विद्यार्थी, प्रशिक्षणार्थी, कामगार यांना सहभागी होता येणार आहे.

            या स्पर्धेत सहभागी होण्याची इच्छा असलेल्या उमेदवारांनी ३० सप्टेंबर २०२५ पर्यंत https://www.skillindiadigital.gov.in या संकेतस्थळावर जाऊन आपली नोंदणी करणे आवश्यक आहे.

अधिक माहितीसाठी इच्छुकांनी शासकीय तांत्रिक विद्यालय परिसर, जी.एस. ग्राऊंडजवळ, जळगाव या कार्यालयाशी संपर्क साधावा. दुरध्वनी क्र.: ०२५७ – २९५९७९० व या महत्त्वपूर्ण संधीचा जास्तीत जास्त युवकांनी लाभ घ्यावा, असे आवाहन संदीप ज्ञा. गायकवाड, सहायक आयुक्त, जिल्हा कौशल्य विकास, रोजगार व उद्योजकता मार्गदर्शन केंद्र, जळगाव यांनी केले आहे.

००००००००००