उत्कृष्ट ग्रंथालय कार्यकर्ता पुरस्कारासाठी अर्ज पाठविण्याचे आवाहन

          जळगाव, दि. 7 :-  महाराष्ट्र शासनाच्या उच्च व तंत्रशिक्षण विभागांतर्गत ग्रंथालय संचालनालयाकडून  राज्यातील शासनमान्य सार्वजनिक ग्रंथालयांचा गुणात्मक विकास व्हावा. त्यांना अधिक चांगल्या सेवा देण्यासाठी प्रोत्साहन मिळावे. या उद्देशाने दरवर्षी “डॉ. बाबासाहेब आंबेडकर उत्कृष्ट ग्रंथालय पुरस्कार” आणि ग्रंथालय चळवळीस योगदान देणा-या सार्वजनिक ग्रंथालय क्षेत्रातील कार्यकर्ता. सेवक यांनी अधिक चांगल्या सेवा देण्यासाठी प्रवृत्त व्हावे, त्यांना प्रोत्साहन मिळावे म्हणून “डॉ. एस. आर. रंगनाथन उत्कृष्ट ग्रंथालय कार्यकर्ता व सेवक ग्रंथमित्र पुरस्कार”  देण्यात येतो.

         राज्यातील शहरी व ग्रामीण विभागातील “अ ते ड”  या वर्गातील उत्कृष्ट शासनमान्य सार्वजनिक ग्रंथालयांना अनुक्रमे रुपये 50 हजार, 30 हजार, 20 हजार, 10 हजार, रोख पारितोषिक, सन्मानपत्र व स्मृतिचिन्ह तसेच राज्यातील प्रत्येक महसुली विभाग स्तरावर प्रत्येकी एक कार्यकर्ता व सेवक यांना प्रत्येकी रुपये 15 हजार रोख पारितोषिक, सन्मानपत्र व स्मृतिचिन्ह देवून गौरविण्यात येते.

          सन 2017-18 च्या पुरस्कार योजनेत सहभागी होण्यासाठी ग्रंथालय, कार्यकर्ते व सेवक यांनी आपले विहित नमुन्यातील अर्ज  20 सप्टेंबर 2017 पर्यत तीन प्रतीत आपल्या जिल्ह्यातील जिल्हा ग्रंथालय अधिकारी या कार्यालयाकडे सादर करावेत. असे आवाहन श्री. किरण गं. धांडोरे, ग्रंथालय संचालक, महाराष्ट्र राज्य, मुंबई यांनी केले आहे.                                              ०००००