मराठा समाज आरक्षणाबाबत म्हणणे मांडण्यासाठी 5 जून रोजी जनसुनावणी

           जळगाव, दि. 29 -  महाराष्ट्र राज्य मागासवर्ग आयोगातर्फे मराठा समाजाचे सामाजिक, शैक्षणिक व आर्थिक मागासलेपण जाणून घेण्यासंदर्भात विभागावार जनसुनावणी घेण्यात येत आहे. याकरीता व्यक्ती, संघटना व सामाजिक संस्थांमार्फत माहिती संकलीत करण्यात येत आहे.  याकरीता आयोगातर्फे मंगळवार 5 जून, 2018 रोजी जिल्हा नियोजन सभागृह, जिल्हाधिकारी कार्यालय, जळगाव येथे जाहिर जनसुनावणी आयोजित करण्यात आलेली आहे.

            जळगाव, धुळे व नंदुरबार जिल्ह्याच्या कार्यक्षेत्रामधील ज्या व्यक्ती, संस्था, संघटना यांना मराठा समाजाच्या आर्थिक, शैक्षणिक व सामाजिक मागासलेपणासंबंधी आयोगासमोर निवेदन सादर करावयाचे आहे. किंवा आपले म्हणणे मांडावयाचे आहे, अशा व्यक्ती, संस्था, संघटना यांनी लेखी पुराव्यासह व ऐतिहासिक दस्तऐेवजासह/माहितीसह 5 जून, 2018 रोजी आपले निवेदन सकाळी 11 ते सायं. 5 या वेळेत जिल्हा नियोजन सभागृह, जिल्हाधिकारी कार्यालय, जळगाव याठिकाणी जनसुनावणीचे वेळी आयोगा समोर सादर करावे. असे आवाहन संशोधन अधिकारी, महाराष्ट्र राज्य मागासवर्ग आयोग, पुणे यांनी एका प्रसिध्दी पत्रकान्वये केले आहे.

०००