जिल्हास्तरीय लोकशाही दिनी 193 अर्ज दाखल लोकशाही दिनी प्राप्त तक्रारींवर तातडीने कार्यवाही करण्याचे जिल्हाधिकाऱ्यांचे निर्देश

            

      जळगाव, दि. 6 (जिमाका) - दर महिन्याच्या पहिल्या सोमवारी होणारा लोकशाही दिन आज जिल्हाधिकारी कार्यालयातील नियोजन भवनात जिल्हाधिकारी किशोर राजे निंबाळकर यांच्या अध्यक्षतेखाली संपन्न झाला. या लोकशाही दिनी जिल्हाभरातून आलेल्या नागरिकांच्या तक्रारी सर्व विभागांच्या जिल्हास्तरीय अधिकाऱ्यांनी तक्रारदारांच्या जागेवर जावून जाणून घेतल्या. आज झालेल्या लोकशाही दिनी एकूण 193 तक्रार अर्ज दाखल झाले. यामध्ये सहकार, जिल्हा परिषद, महसुल, कृषि, महाराष्ट्र राज्य वीज वितरण कंपनी, पोलीस यासह इतर विभागांच्या तक्रारींचा यामध्ये समावेश आहे.

            या लोकशाही दिनास जिल्हा पोलीस अधिक्षक दत्तात्रय शिंदे, अपर जिल्हाधिकारी गोरक्ष गाडीलकर, निवासी उपजिल्हाधिकारी राहूल मुंडके, जिल्हा उपनिबंधक विशाल जाधवर, जिल्हा अधिक्षक कृषि अधिकारी संभाजी ठाकूर, समाजकल्याण विभागाचे सहायक आयुक्त खुशाल गायकवाड, चिटणीस मंदार कुलकर्णी, उप मुख्य कार्यकारी अधिकारी राजन पाटील, जिल्हा महिला व बाल विकास अधिकारी रमेश काटकर यांचेसह विविध शासकीय विभागांचे अधिकारी उपस्थित होते.

            लोकशाही दिनाच्या कार्यक्रमानंतर जिल्हाधिकारी श्री. निंबाळकर यांनी लोकशाही दिनात प्राप्त झालेल्या तक्रारींचा आढावा घेतला. लोकशाही दिनी प्राप्त तक्रारी सर्व संबंधित विभागांकडे पाठविण्यात आल्यानंतर त्या तक्रार अर्जांवर संबंधित विभागाने तातडीने कार्यवाही करण्याचे निर्देश जिल्हाधिकारी श्री. निंबाळकर यांनी संबंधित विभागप्रमुखांना दिलेत.

०००