अनुसूचित जमातीच्या विद्यार्थ्यांना इंग्रजी माध्यमांच्या शाळेत प्रवेश 20 डिसेंबर पर्यंत अर्ज करण्याचे आवाहन

       जळगाव, दि. 6 - आदिवासी विकास विभागामार्फत चालविल्या जाणा-या इंग्रजी माध्यमाच्या एकलव्य रेसिडेन्शियल पब्लिक स्कूल, पेठरोड, नाशिक, पिंप्रीसद्देादिन ता. इगतपुरी, जिल्हा नाशिक, नंदुरबार, ता. जि. नंदुरबार, अजमेर सौंदाणे ता. बागलाण, मवेशी ता. अकोला, व पिपंळनेर ता. साक्री जि.धुळे येथे सन 2018-19 या शैक्षणिक वर्षात इयत्ता 6 वी मध्ये तसेच इयत्ता 7 वी ते 9 च्या वर्गातील विद्यार्थी अनुशेष भरुन काढण्यासाठी अनुसुचित जमातीच्या विद्यार्थ्यांना प्रवेश देणे साठी शासकीय माध्यमिक आश्रमशाळा, दहिवद, ता. अंमळनेर, जि. जळगाव व शासकीय माध्यमिक आश्रमशाळा, गंगापूरी, ता. जामनेर, जि. जळगाव या दोन परिक्षा केंद्रावर स्पर्धा परिक्षा रविवार  दिनांक 10 मार्च, 2019 रोजी सकाळी 11 ते 1 या वेळेत आयोजित करण्यात  येणार आहे.

            अनुसूचित जमाती मधील जे विद्यार्थी सन 2018-19 या चालू शैक्षणिक वर्षामध्ये इयत्ता 5 वी च्या वर्गात शिकत असून, परीक्षेला बसलेले आहेत. व पुढील वर्षी इयत्ता 6 वी मध्ये तसेच 7 वी ते 9 मध्ये प्रवेश घेणार आहेत. अशा इच्छूक विद्यार्थ्यांनी आपल्या शाळेतील मुख्याध्यापकां मार्फत प्रकल्प अधिकारी, एकात्मिक आदिवासी विकास प्रकल्प, यावल, जि. जळगाव यांचेकडे 20 डिसेंबर, 2018 पर्यंत अर्ज करावेत.

            अर्जाचा नमुना प्रकल्प कार्यालय, यावल तसेच मुख्याध्यापक व सर्व गट शिक्षणाधिकारी, पंचायत समिती येथे उपलब्ध आहे. सदर परिक्षा शासकीय आश्रमशाळा, अनुदानित आश्रमशाळा, जिल्हा परिषद शाळा व इतर मान्यताप्राप्त शैक्षणिक संस्थेत शिक्षण घेत असलेल्या इ. 5वी पास ते 9 वी च्या विद्यार्थ्यांकरीता पूर्णत: खुली आहे. यासाठी विद्यार्थ्यांच्या पालकांचे वार्षिक कमाल उत्पन्न रु. एक लाखाच्या आत असावे. विद्यार्थ्याचे पालक शासकीय व निमशासकीय नोकरीत नसावे. अर्जासोबत सक्षम अधिका-यांनी दिलेला पालकांच्या वार्षिक उत्पन्नाचा दाखला जोडणे आवश्यक आहे. अनुसूचित जमातीतील अपंग विद्यार्थ्यांसाठी 3 टक्के व आदिम जमातीच्या विद्यार्थ्यांसाठी 5 जागा आरक्षित राहतील. तरी जिल्हयातील जास्तीत जास्त विद्यार्थ्यांनी योजनेचा लाभ घ्यावा. असे आवाहन प्रकल्प अधिकारी, एकात्मिक आदिवासी विकास प्रकल्प, यावल यांनी केले आहे.

०००